«Ֆինանսական օմբուդսմենի ինստիտուտը․ բարդ վեճեր, արդյունավետ լուծումներ» 14-րդ ամենամյա կոնֆերանս

Սեպտեմբերի 16-17-ին Երեւանում կայացավ Ֆինանսական համակարգի հաշտարարի գրասենյակի կողմից  կազմակերպված 14-րդ ամենամյա միջազգային կոնֆերանսը՝ «Ֆինանսական օմբուդսմենի ինստիտուտը․ բարդ վեճեր, արդյունավետ լուծումներ» խորագրով:
Միջոցառումը մեկ հարթակում համախմբեց Հայաստանի եւ արտասահմանի ֆինանսական ոլորտի առաջատար մասնագետներին՝ քննարկելու սպառողների վստահության ամրապնդման, ֆինանսական ծառայությունների զարգացման եւ վեճերի արդյունավետ կարգավորման արդի հիմնախնդիրները։ Կոնֆերանսին ներկա էր շուրջ 120 մասնակից՝ ներառյալ ՀՀ ֆինանսական համակարգի եւ Կենտրոնական բանկի ներկայացուցիչներ, միջազգային փորձագետներ, ինչպես նաեւ Ֆինանսական օմբուդսմենների գրասենյակների ներկայացուցիչներ։  Կոնֆերանսի ընթացքում քննարկված հիմնական թեմաներն էին արհեստական բանականության կիրառումը հաճախորդների սպասարկման եւ ֆինանսական ծառայությունների ոլորտներում, վճարային խարդախությունների եւ տվյալների պաշտպանության հիմնախնդիրները, ֆինանսական կրթության դերը զեղծարարությունների դեմ պայքարում, ինչպես նաեւ ապահովագրական վեճերի կարգավորման մարտահրավերները։