Ինչու՞ դիմել Հաշտարարին

Հաշտարարն անկախ է պետական և տեղական ինքնակառավարման մարմիններից, պաշտոնատար, ինչպես նաև ֆիզիկական և իրավաբանական անձանցից։ Անկախությունն ապահովվում է թե՛ գործառութային և թե՛ կազմակերպաիրավական երաշխիքներով։ Հաշտարարը պահանջները քննում և լուծում է՝ ղեկավարվելով կիրառելի իրավական ակտերով, գործի հանգամանքները գնահատում է բացառապես իր ներքին համոզմամբ։ Իր գործունեության ընթացքում զերծ է մնում ցանկացած ազդեցությունից։

Հաշտարարն իրականացնում է պահանջի արդարացի և անաչառ քննություն՝ ղեկավարվելով ՀՀ օրենսդրությամբ, գործարար վարքագծի և էթիկայի կանոններով, գործարար շրջանառության սովորույթներով, հաշվի առնելով դատական պրակտիկան և նախադեպային որոշումները։ Պահանջների քննությունն իրականացվում է գործին մասնակցող անձանց իրավահավասարության սկզբունքի հիման վրա:

Հաշտարարի որոշումներին (նախադեպերին) կարող եք ծանոթանալ այստեղ։

Հաշտարարի գրասենյակի գործունեության արդյունավետությունը ապահովվում է գործի քննության արագ և պարզեցված ընթացակարգի շնորհիվ: Պահանջների քննության և լուծման գործընթացում չափազանց ֆորմալ ընթացակարգերի բացակայությունը հնարավորություն է ընձեռում Հաշտարարին ավելի ճկուն գործիքակազմի կիրառմամբ լուծել հաճախորդների կողմից ֆինանսական կազմակերպությունների դեմ ներկայացված վեճերը: Հաշտարարին դիմելիս իրավապաշտպանի անհրաժեշտություն չկա։