ՖԻՆԱՆՍԱԿԱՆ ԶԵՂԾԱՐԱՐՈՒԹՅՈՒՆՆԵՐԻՑ ՊԱՇՏՊԱՆՈՒԹՅՈՒՆ

Քաղաքացին իր բանկային հաշվի քաղվածքն ուսումնասիրելիս հայտնաբերել է, որ իր քարտից առանց իր իմացության և համաձայնության կատարվել են մի շարք գործարքներ։ Դրանց մի մասը մերժվել է, սակայն զեղծարարներին հաջողվել է հաշվից գանձել ընդհանուր առմամբ 68,947.65 դրամ։ Քաղաքացին հայտնել է, որ գործարքների կատարման կամ դրանց փորձերի վերաբերյալ բանկից որևէ ծանուցում չի ստացել, այդ թվում՝ մեկանգամյա օգտագործման հաստատման կոդեր։ Նա նշել է նաև, որ գումարների փոխանցման որևէ հանձնարարական չի տվել և իր անձնական տվյալները այլ անձանց չի տրամադրել։ Կատարվածը պարզաբանելու և գանձված գումարը վերադարձնելու նպատակով քաղաքացին դիմել է բանկին, սակայն հարցը չի լուծվել։ Դեպքի առթիվ նա հաղորդում է ներկայացրել իրավապահ մարմիններին՝ պահանջելով վերադարձնել առանց իր համաձայնության հաշվից գանձված գումարը։

Քաղաքացին Facebook սոցիալական ցանցում ծանուցում է ստացել հարցման վերաբերյալ, որի լրացման դիմաց խոստացվել է 15,000 դրամ։ Գումարը ստանալու համար անհրաժեշտ էր անցնել ներկայացված հղումով։ Հղումով անցնելուց հետո քաղաքացին մուտք է գործել իր բանկային հավելված և նկատել, որ իր հաշվին մուտքագրվել է 40,000 դրամ, որն անմիջապես փոխանցվել է Ռուսաստանի բանկային քարտին։ Դրանից հետո քաղաքացին ծանուցում է ստացել, որ իր անունով հաստատվել է 40,000 դրամի վարկ։ Նա հայտնել է, որ վարկ ձևակերպելու ցանկություն չի ունեցել, համաձայնություն չի տվել, որևէ պայմանագիր չի ստորագրել և գումարը չի օգտագործել։ Քաղաքացու պնդմամբ՝ վարկը ձևակերպվել է առանց իր իմացության և պատշաճ նույնականացման։ Քաղաքացին փորձել է կապ հաստատել ծառայություն մատուցող կազմակերպության հետ՝ կատարվածը պարզաբանելու համար, սակայն իր դիմումի վերաբերյալ հիմնավոր պատասխան չի ստացել։ Արդյունքում նա կանգնել է իր կողմից չստանձնած վարկային պարտավորության խնդրի առաջ։

Քաղաքացու վստահությունը չարաշահելով՝ զեղծարարը նրան հայտնել է, թե գոյություն ունի քայլերը հաշվող ծրագիր, որի միջոցով հնարավոր է քայլերը վերածել գումարի։ Ծրագրից օգտվելու և գումար ստանալու պատրվակով նա լուսանկարել է քաղաքացուն։ Հետագայում պարզվել է, որ լուսանկարն օգտագործվել է վարկի ձևակերպման ընթացքում նույնականացում անցնելու համար։ Ավելի ուշ քաղաքացին ՀՀ ՆԳՆ ոստիկանությունից տեղեկացել է, որ իր անունով, առանց իր իմացության և համաձայնության, ֆինանսական կազմակերպությունում ձևակերպվել է 1,027,369 դրամի վարկ։ Քաղաքացին հայտնել է, որ վարկային պայմանագիր կնքելու ցանկություն չի ունեցել, գումարը չի ստացել կամ օգտագործել, իսկ վարկի գոյության մասին իմացել է դրա ձևակերպումից ամիսներ անց։ Դեպքի առթիվ 2026 թվականի հունվարի 29-ին նախաձեռնվել է քրեական վարույթ, և քաղաքացին դիմել է համապատասխան մարմիններին՝ իրավիճակի պարզաբանման և իր իրավունքների պաշտպանության նպատակով։

2026 թվականի օգոստոսին քաղաքացու հետ WhatsApp հավելվածի միջոցով կապ է հաստատել անհայտ անձ՝ ռուսերենով ներկայանալով որպես բջջային կապի օպերատորի աշխատակից։ Նա հայտնել է, որ հեռախոսի 5G կապի բարելավման համար անհրաժեշտ է որոշակի գործողություններ կատարել։ Զրույցի ընթացքում քաղաքացու հեռախոսի էկրանն անջատվել է և որոշ ժամանակ անց կրկին միացել։ Այնուհետև էկրանին հայտնվել են բջջային օպերատորի տարբերանշանը և կարգավորումների դաշտեր, այդ թվում՝ «OK» կոճակը, որը քաղաքացուն հանձնարարվել է սեղմել։ Այդ ընթացքում քաղաքացին չի կարողացել վերահսկել հեռախոսում կատարվող գործողությունները։ Ավելի ուշ, ստուգելով իր բանկային հավելվածը, քաղաքացին հայտնաբերել է, որ իր անունով առանց իր համաձայնության ձևակերպվել է 2 միլիոն դրամի վարկ, իսկ գումարը քարտային հաշվից փոխանցվել է այլ հաշվի։ Քաղաքացին պնդել է, որ վարկի ձևակերպման համաձայնություն չի տվել, պայմանագիր չի ստորագրել և վարկային գումարը չի օգտագործել։ Նա դիմել է ֆինանսական կազմակերպությանը և իրավապահ մարմիններին։ Դեպքի առթիվ նախաձեռնվել է քրեական վարույթ, և քաղաքացին ճանաչվել է տուժող։